ڕۆژی یەکشەممە

نزار و بەلقیسی هاوسەری

October 30, 2018

 

 

 

ڕۆژی یەکشەممە
نزار قەببانی
وەرگێڕانی لە عەرەبییەوە: خەڵات عەلی/گۆران سپێرۆیی

 

 

 

 

 

1

بەڕاستی خۆشم دەوێیت…

‎بەڕاستییش ڕقم لە پشووی ڕۆژی یەکشەممەیە.

‎ڕقم لەوەیە بوەستم له خۆشەویستیمان…

‎هەتا بۆ کاتژمێرێکیش …

‎بۆ ساتێکیش…

‎هەموو پشووەکان لە خۆشەویستیدا وەهمن…

‎هەموو کۆچکردنێکیش بێسوود…

‎لە بەرەی خۆشەویستیدا، جەنگاوەرەكان پشوو نادەن

‎لە شۆڕشی دەریاش، بەلەمەکان پشوو نادەن.

 

 

2

بەڕاستی خۆشم دەوێیت و

‎ڕقم لە هەر نیوەڕۆیەكە ونی بكا لێم :

‎ڕووخسارت

‎دەنگت

‎سینگی زیوینت

‎ڕەتی دەكەمەوە تۆ لە بەردەممدا نەبیت

‎تۆ لە گلێنەی چاوما نەخەویت،

‎دەترسم كاتمان لێ بدزن

‎بەشێك لە ژنێتی بكەوێت لە تۆدا و

‎هەندێك لە شیعریش لە مندا.

 

 

3

‎دەیانەوێت هەندێک پشوو بدەم،

‎لە خۆشەویستی… لە ڕۆژی یەکشەممە…

‎کێ گوتی من لە مردن ماندوو بووم بە هۆی عەشقەوە؟

‎کێ گوتی من وازم لە سەمای سەر کڵپەی ئاگر هێناوە؟

‎چۆن دڵم بەرنامەڕێژ بکەم؟

‎تا ڕۆژی یەکشەممە خۆشی نەوێیت…

‎چۆن دەمم فێر بکەم؟

‎کە ڕۆژی یەکشەممە ماچت نەکات…

‎چۆن ئارامیم ڕابێنم لەسەر ئارامگرتنی ڕۆژی یەکشەممە؟

‎چۆن بە شیعرم بڵێم تا دوای یەکشەممە چاوەڕێم بکە؟

‎هەموو ڕۆژێکیش کە تۆی تێدا نابینم، ئەبەدێکە…

 

 

4

بەڕاستی خۆشم دەوێیت

‎تێپەڕینی ئەو ڕۆژە دوودڵم دەکات کە تێیدا بە خورپەوە قسە بۆ ژیانم ناکەیت…

‎بە کودەتاوە قسە بە شیعرم ناکەیت…

‎ئاگر لەناو وشەکانمدا هەڵناگیرسێنیت…

 

 

5

‎بەڕاستی خۆشم دەوێیت و

‎تێپەڕینی خولەکەکان دەمترسێنێت کە تێیدا باوەش بە دەستی ئاوریشمیتەوە ناكەم

‎خۆشم بە ڕووناکیی مانگ ناشۆم…

‎قسەکانت شیعرن

‎بێدەنگیت شیعرە…

‎خۆشەویستیت وەک برووسکە لە نێوان دەمارەکانمدا ڕادەکات،

‎وەک قەزا، وەکوو قەدەر…

 

 

6

‎وەکوو قوتابییەکانی ڕۆژی یەکشەممە سزا دەدرێم.

‎نە سەفەرێک بەرەو بەفری باکوور

‎نە سەفەرێک بەرەو دەریای باشوور…

‎نە گەشتێک بۆ ناو چاوە گەورەکان و

‎نە هیچ دەرفەتێک تا پێنج خولەک بخەوم،

‎لەژێر پرچی ئاوریشم…

‎پێنج خولەکیش

‎لەسەر پێخەفی شاژن…

‎ئەی ئەو ئافرەتەی کە وردەکارییەکانی تەمەنمی لە دەستتدایە…

‎داخۆ کێ دەبم؟

‎ئەگەر شتە بچووکەکانت لێم نەبرد؟

 

 

7

‎هەست دەکەم کە ڕۆژنامەکانی ڕۆژی یەکشەممە،

‎لە بەیانییەکدا ئابڵووقەم دەدەن وەک ڕەشەبایەکی بە زەبر

‎هەست دەکەم من بێ تۆ وەک دارخورمایەکی ڕووتم.

‎لە ڕۆژهەڵات و ڕۆژئاوای لەندەن ون دەبم،

‎سۆزیشم لە چۆڵەوانی دەمێنێتەوە.

 

 

8

‎ڕۆژی یەکشەممە، درێژە… درێژ

‎ڕۆژی یەکشەممە، بێزارکەرە… بێزارکەر!

‎لەندەنیش سەرقاڵە بە تەڵاقی (دایانا) و لە (شێتیی مانگاکان)ــیش دەترسێت.

‎لەبەر ئەوە هیچ پاسێک نایەت وەک چۆن دەهات…

‎هیچ شیعرێکیش نایەت وەک چۆن دەهات…

‎گوارە درێژە زێڕینەکەیشت، داوەتی سەفەرێكم پێشکەش ناکات.

 

 

9

‎بەڕاستی خۆشم دەوێیت و

‎هەست دەکەم کە شارستانییەتی لەندەن بانگمان دەکات لەوەتەی گەیشتووین…

‎شەقامەکانیشی لەسەر دەستمان یەکتر دەبڕن…

‎هەور، کۆتر، پرد، گوڵی ماڵەکان، شووشەی کەنیسەکان و گوڵی باخچەکان…

‎کە تێ دەپەڕین، ئاماژەمان بۆ دەکەن…

 

 

10

‎بۆ کوێ ڕابکەین لە دەست شمشێری تامەزرۆییمان؟

‎ڕۆژی یەکشەممە…

‎هیچ قاوەیەک لە هیچ کوێ ناخۆینەوە…

‎هیچ نێرگزێک و هیچ حاجیلەیەکیش ناکڕین…

‎هیچ کتێبێکی شیعریش لە نێوان دەستەکانماندا پێ ناکەنێت…

‎هیچ بەریەککەوتنێکی سۆزاوییش نابێت…

‎هیچ پەرداخێکیش لە شەڕاب، لە ساتێکدا ڕەنگی چاوەکانت ناگۆڕێت…

‎سنووری کاتیش ناسڕێتەوە.

 

 

11

‎گەر تۆ نەبارێیت

‎باران لە كوێوە دێت؟

‎گەر تۆیش نەبیت

‎گرنگ نییە بوونی بەشەر

 

 

‎12

‎بۆ كوێ خانمەكەم؟ نیشتیمانت جێ هێشت؟

‎تاكەبەردێكت بەجێ نەهێشت

‎چێشتخانەیەكت بەجێ نەهێشت

‎شانۆیەكت بەجێ نەهێشت

‎مۆزەخانەیەكت بەجێ نەهێشت

‎چۆن لە ڕووی مەنفا بوەستمەوە بە تەنیا؟

‎كە تۆ شاژنی ئەم نیشتیمانەیت.

 

 


 

 

لەندەن: ئایاری ١٩٩٦