ئەوەی جارێک دڵمی شکاند سەد جار لێی خۆش بووم

سایە فووغان/شاعیری کورد

May 24, 2018

 

 

سایە فووغان لە ساڵی ٢٠٠٠ـدا لە برادۆست لە دایک بووە و لە هەولێر دەژی. ئەو تەنیا هەژدە ساڵیەتی و ماوەی چەند ساڵێکیشە دەستی کردووە بە شیعرنووسین. دەخوێنێت و خوێندکاری شەشی ئامادەیییە. زۆرێک لەم شیعرانەی لە ماوەی ساڵانی ڕابردوودا نووسیون، کە ئەوکات منداڵتریش بووە. نیگای پاکژی ئەو بۆ شتەکان و دەوروبەری، لە شیعرەکانیدا بە ڕوونی هەستی پێ دەکرێت، تەنانەت نزیکبوونەوەی لە هایکۆی ژاپۆنییش، لەم سۆنگەیەوەیە. باڵندە بە خۆشحاڵییەوە شیعرەکانی ئەو بڵاو دەکاتەوە، کە هەوڵ بدات ئەدەبیاتێکی لەمە باشتر بخولقێنێت؛ بەو هیوایە. – باڵندە

 

 

 

ئەوەی جارێک دڵمی شکاند سەد جار لێی خۆش بووم
سایە فووغان

 

 

حەز دەکەم
بە بیانووی
ئارووتەواوبوون بێم بۆ ماڵتان

 

ئەگەر تەنیا بوویت
دڵخۆشی
خواردنەوەی چایەکە

 

دوای تۆ
لە خانوویەک دەچم
بەعس خاپووری کردبێت

 

بۆیە منیش بوومە شاعیر
کە جوانیم دۆزییەوە

 

تۆ وەک داهۆڵیت لە ژیانمدا
بۆیە خەم لێم نزیک نابێتەوە

 

وەک دارتووەکانی
ناو حەوشەکەمان
من
غەریبم

 

ئێوارە
چاوەڕێی شنەبایەک بووم
ئەویش نەهات

 

گوڵێکی حەوشەکەمان ژاکا
دەکرا
دڵۆپێک ئاوم بام

 

هێندە جوان گوڵەکان ئاو دەدەیت
گوڵبوونیش دەبێتە خۆزگەیەک

 

بەم گەرمایە
بیر لە تۆ دەکەمەوە
چۆن بەم گەرمایە
دەتوانم بیر لە تۆ بکەمەوە؟

 

هێندەیش ڕەشبین نەمام
کاتێک بە چاوەکانی تۆ
ڕوانیمە دنیا

 

وەک حەبیبە
کچەکەم لەبەر خۆیەوە پێدەکەنێت
دەزانم چی ڕووی داوە

 

ئەوەی جارێک دڵمی شکاند
سەد جار لێی خۆش بووم
تەنانەت ڕووم گرژ نەکرد

 

دایکم دەکۆکێت
خۆزگە من
شرووبە تاڵەکە دەبووم

 

گەڵا بوومایە
بە پاییزم دەگوت
زووتر بێت

 

دەمەوێت دەست بکەم بە نووسین
وشەکان هێندە زۆرن
سەرم لێ دەشێوێت

 

گەر وەک منداڵی
پێڵاوەکانت لێ بشارمەوە
لە لام دەمێنیتەوە؟

 

کە چاوەکانم داخست
دەفتەرەکەم پڕ بوو لە نووسین
دەستەکانم ماندوو

 

ژنێک
شەوانە ژێر سەرینەکەی پڕ دەکات لە گیان
بەیانیان بە خەندەوە گوڵەکان ئاو دەدات

 

کامێرا بوومایە
تەنیا وێنەی
تۆم دەگرت

 

من نووسینم هەڵبژارد
دواجار دەبمە وشەیەک
لەنێو کتێبێکی کۆندا


 

ئاروو: خەیار