سێ شیعری فێرناندۆ پێسۆوا
فێرناندۆ پێسۆوا / پۆرتوگال
December 4, 2022
فێرناندۆ پێسۆوا شاعیر و نووسەر و فەیلەسووف و وتارنووس و شانۆنووس و وەرگێڕ و توێژەرێکی پۆرتوگالییە. لەدایکبووی ١٨٨٨ـە. شاعیرێکی ناوداری دنیایە و بەرهەمەکانی بە ٧٢ ناوی جیاواز بڵاو کردووەتەوە. ساڵی ١٩٣٥، لە تەمەنی ٤٧ ساڵیدا دەمرێت.
ئەمە بۆ یەکەمین جارە شیعرەکانی لە زمانی یەکەمەوە وەردەگێڕدرێت و بڵاو دەبێتەوە.
سێ شیعری فێرناندۆ پێسۆوا
فێرناندۆ پێسۆوا
لە پۆرتوگالییەوە ژیار هۆمەر
هەموو نامەیەکی دڵداری گاڵتەجاڕییە
هەموو نامەیەکی دڵداری گاڵتەجاڕییە.
نەدەبووە نامەی دڵداری، گەر گاڵتەجاڕی نەبووایە.
منیش وەختی خۆی نامەی دڵداریم نووسیوە،
چەشنی ئەوانی دی، گاڵتەجاڕانە.
گەر خۆشەویستی هەبێت، نامەی دڵداری گاڵتەجاڕییە.
سا ئەو کەسانەیشی قەت نامەی دڵدارییان نەنووسیوە،
خۆیانن گاڵتەجاڕییەکە.
خۆزگەم بەو سەردەمەی نامەی دڵداریم دەنووسی
و نەمدەزانی گاڵتەجاڕییە.
ڕاستییەکەی هەنووکە
ڕامانم لەو نامە دڵدارییانە
هەر هەمووی گاڵتەجاڕییە.
(ئەو پەیڤە باقوبریقانە،
ئەو هەستە سەمەرانە،
سەرتاپای هەڵقووڵاوی گاڵتەجاڕییە.)
٢١\١٠\١٩٣٥
کەس کەسی خۆش ناوێت
کەس کەسی خۆش ناوێت،
هەر وێنەکەی خەیاڵی و ئەوەی تێیدایە خۆش دەوێت.
سا خۆشیان نەویستیت، دڵت دانەخورپێت.
دەزانن کێیت، تۆیش غەریب و بێگانەیت.
مڕومۆچ مەبە، گەر قەتیش نەیانویستیت.
ئەرخەیان بە، کەمتر ئازار دەچێژیت.
١٠\٨\١٩٣٢
ئەڤین هاودەمییە
ئەڤین هاودەمییە.
من چیدی نازانم ملی ڕێگاکان بگرم،
چونکە ناتوانم تەنیاباڵ بە ڕێدا بڕۆم.
تراویلکەی خەیاڵێک هەنگاوەکانم پێ گورجتر دەکات،
سۆمای چاوم کزتر دەکات و چێژی بینینی هەموو شتێکم پێ دەدات.
دوورییەکەی ئەویش بووەتە گرێ لەسەر دڵم.
هێندە خۆشیشم دەوێت نازانم چۆن ئاواتی پێ بخوازم.
نەیبینم، دەیهێنمە بەرچاوم و چەشنی پیرەدار پتەوم.
بیبینم، هەڵدەلەرزم و سوێی دوورییەکەی دەڕوات لە دڵم.
سەرتاپام وەک گوژمێک وەلام دەنێت.
سەرتاپای حەقیقەتیش وەک گوڵەبەڕۆژە تێم دەڕوانێت،
چەقەکەی ڕووخساری ئەوە.
١٠/٧/١٩٣٠
سەرچاوە:
-
Poesias de Álvaro de Campos. Fernando Pessoa. Lisboa: Ática, 1944 (imp. 1993), 84.
-
Odes de Ricardo Reis. Fernando Pessoa. Lisboa: Ática, 1946 (imp.1994), 145.
-
“O Pastor Amoroso”. Poemas de Alberto Caeiro. Fernando Pessoa. Lisboa: Ática, 1946 (10ª ed. 1993), 100. (Traduzidos para curdo por Jiyar Homer)
