چوار شیعری ئارمین چالاک
ئارمین چالاک/ کوردستان
October 30, 2020
ئارمین چالاک، نووسەرێکی لاوی کرماشانییە، شیعر دەنووسێ، هەروەها یادداشت و توێژینەوە لەمەڕ بابەتەکە زمانەوانیی و فەرهەنگییەکانی کۆمەڵی کوردەوارییش بە زاراوەى کوردیی خوارین بڵاو دەکاتەوە.
چوار شیعری ئارمین چالاک
دەنگی وەرلە وشە و ناوەگان
جاران نەۊمنە
ئێسە نیەیم
دۊایشی نیەۊم
پابەن تێپەڕ بۊن سات نیەیم
خۊن نیەیم
گووشت نیەیم
نزرگەی هەناسو، تیەنی ئاو و ورسی نان نیەیم
دەنگو، ناو و وشەییم
خوداگان ئیمە دوروس نەکردن
بی دەنگی بەرد کویە
کشەی وای ناۆ دارسان
تکەی ئاو کانیاوەگان
چرپەی مەل باخەگان؛ ناو ئیمە نان …
ئیمە دەنگ نەوڕیای دەیشت و کویەیم
داڵەهوو شاهوو بێستۊن و پەڕاویم
سەیمەرە، ئەڵوەن و سیروانیم
بەرۊ ، وزم و بایەمیم
تو هۊر کردیدە گولەو دار و ئاگر دەنگبڕە
نە نە نە !
ئاو زەل مەیە
فارس باری ، عەرەب باری ، تورک باری
لەی وەڵاتە تەنیا سروشت دەسەڵاتە
ئاخرسەر ژیان لەیرە وە کوردی خەڵاتە
داڵگ مناڵ وە لاوەلاوە گەورە کەید
دەوریش وە دەنگ تەمۊرە و دەف باڵەو گری
ئەوین وە بەزم هوورە هەڵپەڕی
مووریش کووچەیل دۊا تیەری …
نۊر هوورە
خوەر دی لە نیشتمان دیاری نەمەنیە
کوونە کانیاوەگان لە شەپۆل چوڵ بینە
داربەرۊ باوەش وا لە هۊر بردیە
لە شەو تووریاس
هەور نۊر ئاسارە لە ئاسمان داپوشاس
زەوی لەدۊری ماچ ئەسر هەورەگان
داڵگی ئەڕا هۊچ تووم گوڵیگ نیەکەید
ئاسیاو سەر هۊچ چەمیگ دی گەنم ناهەڕی
کووانی ناندان هۊچ ماڵیگ گڕەی ئاگر لەلی نیەتی
تو بوس ! تو بوس !
چمان دەنگی تیەی !
لە قۊلای ئی تاریکیە چرپەی ڕەنگیگ تیەید
لە بەرزی بێستۊن کورپە کوڕیگ وساس
چمان دیری هوورە چڕی …
چمام دیری هوورە چڕی …
شیعر و ماچ
ئاخ شیعر
تو نامرێ
تو هەر هەسەد
چشتی هۊشی وەزوان نیەتیەی
جییگ چییدن هۊچ نەچیە
کاریگ کەیدن کەس نەکردیە
دەردیگ کێشی کەس نەکێشاس
تو هەر بیدە
وەرجە ئەزەڵ
هەر مەنیدەد تا دۊای ئەبەد
خوەد خاس بۊند کوڵە
هەر هاتی دی نیەمەنی
تو جور ماچی
نە هەر ماچیگ
بی شوون
بی شایەت
دوزی یا لە ئاشکەرا
کوڵوو کوڵبڕ
لە ناکاوە
ماچ ئەوەڵ
تەنیا عاشق تامد زانی
ئاخ شیعر
ئاخ ماچ
چەنی ئیوە بۊندان خوەشە
دەرد گوڕنین
شیرین یا تاڵ
کار پیکنین
وەلی ئاخر هەر نیەمەنین
ئێوە بۊشن
دۊر لەیەسە مانای ژیان؟
چەوچە دڵ تەڕەگە
چەوچەیگم من
لە هۊر چیمە یا نەچیمە ؟
نیەزانم خاس !
تەنیا زانم یانەم یەسە
سۊک فکر پیرەمەردیگ
ئەڕا یە چشت هەر مەنمە
بوومە هەست گەرمو گوڕیگ
لە ناو جەمیگ
شایەد بەزمیگ
کاشکا دانیشتنی
وە وشە وشەیل خوەم قەسەم
«تەنیا توام زور زوان هەڵبدڕم»
بوومە دەنگی
لەی دونیای هەزار ڕەنگە
بوومە میوان تین دڵ پیرەژنی
شایەد ڕوژی
شایەد ساتی
وەرجە مردن
وە بی خەوەر
کڕ و کپ و بی هاتوچوو
دۊر لە رەنگو، ئابڕۊ و گیفان
بیمە شایەت عشق پاکیان.
