کۆترەکە بە هەڵەدا چوو
ڕافائێل ئەلبێرتی | (١٩٠٢ - ١٩٩٩)
November 24, 2024
ڕافائێل ئەلبێرتی شاعیرێکی مەزنی ئیسپانییە، ساڵی ١٩٠٢ لە هەرێمی ئەندەلووس هاتووەتە دنیاوە. دواهەمین شاعیری نەوەی ٢٧ـە، خەڵاتی نیشتمانیی شیعری لە ساڵی ١٩٢٥ و خەڵاتی پڕبایەخی سێرڤانتێسی لە ساڵی ١٩٨٣ـدا وەرگرتووە. ساڵی ١٩٩٩، لە تەمەنی ٩٦ ساڵیدا، دواکۆچی کردووە. «کۆترەکە بە هەڵەدا چوو» بەناوبانگترین هۆنراوەی ئەلبێرتییە و سترانبێژی وەک مێرسێدێس سۆسا و خوان مانوێل سێڕات چڕیوویانە.
کۆترەکە بە هەڵەدا چوو
ڕافائێل ئەلبێرتی
کوردییەکەی ژیار هۆمەر
کۆترەکە بە هەڵەدا چوو.
هەر بە هەڵەدا دەچوو.
دەیویست بچێت بۆ باکوور، چوو بۆ باشوور.
وای زانی گەنمەکە ئاوە.
هەر بە هەڵەدا دەچوو.
وای زانی دەریاکە ئاسمانە،
نیوەشەوەکە بەرەبەیانە.
هەر بە هەڵەدا دەچوو.
وای زانی ئەستێرەکە شەونمە،
گەرماکە کڕێوەیە.
هەر بە هەڵەدا دەچوو.
وای زانی تەنوورەکەت بلووزەکەتە،
دڵت ماڵی ئەوە.
هەر بە هەڵەدا دەچوو.
(ئەو لە کەناردەریاکەدا خەو بردییەوە،
تۆیش بە چڵەپۆپەی دارێکەوە.)
سەرچاوە:
Se equivocó la paloma, Rafael Alberti, Antología comentada, Vol. 1, pp. 56-57, Ediciones de La Torre, 1990 (traducido al kurdo por Jiyar Homer)
