شیعرە پەناگە

عەباس کیاڕۆستەمی/شاعیر و سینەماکاری ئێرانی

February 13, 2022

عەباس کیاڕۆستەمی، شاعیر، وێنەکێش، سینەماکار و فۆتۆگرافەری ئێرانی، لە ٢٢ـی جوونی ١٩٤٠ـدا لە تاران-ئێران لە دایک بووە. ٤ـی جووڵای ٢٠١٦ لە پاریس-فەڕەنسا لە تەمەنی ٧٦ـساڵیدا کۆچی دواییی کرد. ئەو بە فیلمی “تامی گێلاس” لە جیهاندا ناسراوە. فیلمەکانی بە نێوەڕۆکە سادە و مرۆڤانییەکەیانەوە دەناسرێنەوە. – ماڵپەڕی باڵندە

 

 

 

شیعرە پەناگە
عەباس کیاڕۆستەمی
وەرگێڕانی: بیلال نەسرین

 

 

لە درزی دەرگاوە
هەم بڵێسە دێتە ژوورێ،
هەم نووری مانگ

 



 

کە لەگەڵ تۆم
لە ئازاردام
کە لەگەڵ خۆمم
لە ترسدا
لە کوێی ئەی بێخودی؟

 



 

لەودیو چاکە و خراپەوە
ئاسمان شینە
شین

 



 

لە تاو ستەمی ڕۆژگار
شیعرە پەناگە
لەتاو جەوری یار
شیعرە پەناگە
لەتاو زوڵمی ئاشکرا
هەر شیعرە پەناگە

 



 

گوڵە پەشموردەکانی بیابان
نە کەس بۆنی پێوە کردن
نە کەس چنینی
نە کەس فرۆشتنی
نە کەس کڕینی!

 



 

گەلێ عاشق
گەلێ مەعشووق
عاشق و مەعشووق
کەم!

 



شەو لە کاتی خۆیدا گەیشت
سپێدە لە کاتی خۆیدا هەڵهات
کەڵەشێر لە کاتی خۆیدا خوێندی
من لە ناکاتدا
نووستم!

 

