دەمەوێت ئەوەندە شیعر بڵێم نەتوانی حاشام لێ بکەیت
ئێلهام ئێسلامی | (١٩٨٣ - ٢٠١١)
October 8, 2024
ئێلهام ئێسلامی، ساڵی ١٩٨٣ لە شاری مەحموودئاباد سەر بە پارێزگای مازەندەران لە دایک دەبێت. بڕوانامەی ماستەر لە زمانی ئینگلیزیدا لە زانکۆی پەیام نوری مەشهەد بەدەست دەهێنێت. یەکەم کۆمەڵە شیعری، بە ناوی “دنیا چاوی لەسەرمان لا نابات”، دەبێتە بەربژێری دووەمین خولی خەڵاتی شیعری ژنان (خورشید)، هەروەها لە ساڵی ٢٠٠٨ ـدا سێیەمین خولی خەڵاتی کتێبی ساڵ بۆ شیعری گەنج دەباتەوە. دووەم کۆمەڵە شیعری، لەپاش مەرگی ناوادەیدایە، بە ناوی “تۆ درەختی لیمۆ من درەختی بەرەبەیان” بڵاو دەبێتەوە.
لە ٥ـی سەرماوەزی ٢٠١١ دا، ئێلهام لەگەڵ هاوسەرەکەی، غوڵامڕەزا بوروسان (کە ئەویش بە هەمان شێوە شاعیرێکی دیار بووە) و کچەکەیان، لەیلا، لە ڕووداوێکی هاتوچۆدا گیان لەدەست دەدەن.
دەمەوێت ئەوەندە شیعر بڵێم نەتوانی حاشام لێ بکەیت
ئێلهام ئێسلامی
کوردییەکەی دانیال محەمەد
کوردییەکەی بە نەوا پێشکەشە
١
نامەوێت قوماشێکی ئاوریشمین بم
شاهانە و مات و خەمگین
دەمەوێت کەتان بم
بە بەر ژنێکی بەقەڵافەت و بەخۆوە
کە لێوەکانی
وەختی ماچکردن گورز دەوەشێنن و
نیگای
کاتی بینین، گەمارۆ دەدات
سەراپای ئەم ڕۆژانە خەمینن
من کوندەپەپوویەکی پیرم
کە شووشەیەکم نەدۆزییەوە لەبۆ تاریکی
دەترسم خەونەکەم لە لقی دارەکان گیر بکات
دەترسم لە خەو ڕابێم و ببینم
ژنێکم لە ئێراندا.
خەمۆکییەکەم ئاسایییە
وەلێ کارێ بکە ڕەزا گیان پاییز تەواوبێت
بێتو مەرگ بێت نازانم
هەوەڵجار ئەوکم دەگوشێت
یانیش دڵم
ئەو ڕۆژە لەکوێی ماڵەوەدا دانیشتبووم
وا دەمتوانی ئەو هەمووە شیعر بڵێم؟
کام گڵۆپ ئیشی دەکرد؟
دەمەوێت ئەوەندە شیعر بڵێم
کە گەر سبەی مردم
نەتوانی حاشام لێ بکەیت
دەمەوێت شیعرم وەک قسەوقسەڵۆکێک بە شاردا بڵاوبێتەوە و
ژنان
هەرجارەو شتێکی پێ زیاد بکەن
ئەمشەو تەواو نابێت
ئەمشەو دەبێت یەک لە ئێمە شیعر بڵێت
یەک بگری.
لە دڵمدا جێیەک بۆ خۆحەشاردان نییە
من تەنگم بە گشت گۆشەکان هەڵچنیوە
سا وەختی ئەوەیە مەرگ بێت و
قۆچەکانی لە دڵم ڕۆ بکات.
٢
جاری وایە پێ دەکەنم
جاری وایە دەگریم
لێ گریان فرەتر پێش دێت
هەرچۆنێکبێ مرۆ
یەکێک لە جلکەکانی زیاتر خۆش دەوێت.
٣
ڕۆژ بە پیاڵەی بلوردا تێدەپەڕێت
شەو لە پیاڵەی بلوردا پشوو دەدات
تۆ لە پیاڵەی بلوردا چا دەخۆیتەوە
من پیاڵە بلورەکە دەشکێنم و
ژیان
لە دەفرێکی دیکەدا پاتە دەبێتەوە.
٤
سەرباز!
هاوسەرەکەم مەکوژە
ئەو شاعیرە؛ دنیا لە شیعر خاڵی مەکە
سەرباز!
منداڵەکەم مەکوژە
منداڵان لەناکاو بە مەرگ دەزانن
ئێمە خوازیاری جەنگ نەبووین
ئێمە لە بێدەنگی پەشیمان بووین.
٥
بەهێز نیم گەر شیعرێک دەنووسم
بەهێز نییە با گەر جلکەکان بە تەنافەکەوە دەلەرێنێتەوە.
دەمی خۆراوابوون کاتێکی خەمینە
ناتوانێت هەتا ئینجانەیەک بخاتە خوارەوە و
خەم تۆزقاڵێک جێ گۆڕکێ بکات.
لە ماڵەوە دانیشتووم
ئەژنۆکانم لە باوەش گرتووە
تا تەنیاییم کەمتربێتەوە
تەنیاییم
دۆڵابێک پڕ لە جلک
ژوورێک کە دەرگاکەی کڵۆم نادرێت
تەنیاییم هێلکەشەیتانۆکەیەکە
کە ماڵیان بە بەرد کوشتوە.
٦
جوانیی تۆ
سینی چاکە قڵپ دەکاتەوە
دڵتەنگم
بێ ئەوەی منداڵێکم هێنابێتە دنیا، دڵتەنگم
منت خۆشبوێت
وەها باوەڕت پێ دەکەم
کە لقەکانت بە شکان ئومێدەواربن
من کچی فەلایەکم
ئاو بە و لەگەڵمدا میهرەبانی پیشەکە
سەرکێشی مەکە
دڵی من وەپێش هەنگاوەکانی تۆ دەکەوێت
بهێڵە شەو دابێت و شەقام لاتەریک بکات
تا لە باوەشت بگرم
تۆ دیوارێکی کە هیچ دەرگایەک لە دڵتەنگییەکەت کەم ناکاتەوە
هەمیشە چا دەخۆیتەوە و شیعر دەخوێنیتەوە
دەنگی تۆ خەمبارم ناکات
تەنیام دەکات.
٧
تاوانێکی گەوەرەیە مەرگ
تەنیا جێهێشتنی تۆ و منداڵەکان
شتومەکەکان بیرچوونەوە وەدوا دەخەن
ناهێڵن لەبیرمکەیت
مەنجەڵەکان دەفتەرە شیعرەکەم و
پاڵتاوێکی قاوەیی کە چەندەم خۆشدەویست
چی لەوانە دەکەیت؟!
٨
شیعرێک بڵێ ڕەزا
شیعرێکی درێژ
هێندەی کە حاڵم باش بێت
هەڵسمەوە
قاپەكان بشۆم
دەستێک بهێنم بە ماڵەکەدا و
گۆرەوییەکەت پینە بکەم.
٩
ئێمە نەڕۆشتین بۆ جەنگ
لە چەڵتووکجاڕدا ماینەوە و
برنجی خەمناکمان بەرهەم هێنا.
