وەک دوو هێڵی شەمەندەفەر
کەریم تاقانە/وەرگێڕ و شاعیری کورد
April 16, 2018
کەریم تاقانە، زیاتر وەک وەرگێڕی زمانی سویدی ناسراوە و کەمتر کەسێک ناوی ئەوی وەک شاعیر بیستووە. ئەو لە ڕۆژنامەی سوید بۆ ماوەی ٧ ساڵ دەچێت گۆشەی بە زمانی سویدی هەیە و بە گشتی هەوڵ دەدات ئەدەبیاتی کوردی بناسێنێت. یەکەم کتێبی تاقانە بریتییە لە “نیشانەی چوارکەس” لە نووسینی سێر ئارسەر کۆنان دۆیڵ، کە لە ئینگلیزییەوە کردوویە بە کوردی و ساڵی ٢٠٠١ لە بەغداد چاپ بووە. پاشان “جەللای”ـی پێر لاگەرکڤیست و دواتر “نەخۆشیی مەرگ”ـی دوراسـی کرد بە کوردی، هەروەها “خۆزگە بەردەکانیش دەیانتوانی بدوێن” لە نووسینی ماگدا ئێگێنس. ئەم دوو کتێبەی دوایی ناوەندی غەزەلنووس چاپی کردوون. کەریم تاقانە وەرگێڕی شیعریشە و دوو کتێبی شیعریی شاعیری سویدی ئێڤا ڕیبیکـی کردوون بە کوردی، کە لە ٢٠١٨ـدا چاپ و بڵاو دەبنەوە. – باڵندە
وەک دوو هێڵی شەمەندەفەر
کەریم تاقانە
(1)
چوومه نێوته‌وه
ئێستا سه‌رلێشێواوم!
(2)
تۆ
له مندا
خۆتت دۆزییه‌وه،
به‌خته‌وه‌ر.
من
له خۆمدا
خۆمم لێ به‌ربووه‌وه،
وڕوگێژ.
(3)
تۆ،
ڕووناکایی له ڕۆژه تاریکه‌کانمدا.
من،
تاریکایی له شه‌وه سپییه‌کانتدا!
(4)
هیچ ژنێک به ئه‌ندازه‌ی تۆ
خۆشی نه‌ویستم!
هیچ ژنێک به ئه‌ندازه‌ی تۆ
دڵه‌خورپه‌ی پێ نه‌دام.
هیچ ژنێک به ئه‌ندازه‌ی تۆ
دڵی لام نه‌بوو،
ته‌نانه‌ت خۆیشم!
(5)
تۆ زه‌ریا بوویت
من،
به‌رد.
شیناییی چاوت بانگی کردم و
من خۆمم هه‌ڵدایه نێوته‌وه.
که‌سێک هه‌یه بتوانێ
له‌نێو تۆم
ده‌ربێنێ؟
(6)
من و تۆ
دوو هێڵی ئاسن،
به ته‌نیشتی یه‌کتردا.
به ته‌نیشتی یه‌کتردا
زۆر جار لێک هه‌ڵده‌بڕێین
ون ده‌بین
زۆر جار دێینه‌وه ته‌نیشتی یه‌کتر.
من و تۆ
دوو هێڵی ئاسن.
به ته‌نیشتی یه‌کتردا،
درێـــژ.
ناگه‌ین به یه‌ک.
31-08-2011 سوید
