کاتێک یەکتریمان جێهێشت
لۆرد بایرن | (١٧٨٨ - ١٨٢٤)
August 29, 2025
لۆرد بایرن یەکێکە لە گەورەترین شاعیرانی ئینگلاند. لە ساڵی ١٧٨٨ لە ئینگلاند لەدایکبووە. کاتێک باسی ڕۆمانتیکی ئینگیلیزی بکەین بێگومان دیارترین ناوێک بێتە بەر گوێمان بایرنە. تەمەنێکی کەم ژیاوە بەڵام کاریگەرییەکی ئێجگار گەورەی هەبووە لەسەر شیعری ئەورووپی. یەکەمین کتێبی شیعری لە ساڵی ١٨١٢ بە ناوی زیارەتەکەی چایڵد هارۆڵدبڵاو کردۆتەوە. مانفرێد و دۆن جوان لە کارە دیارەکانی ئەون. بایرن لە ساڵی ١٨٢٤ لە یۆنان کۆچی دوایی دەکات.
کاتێک یەکتریمان جێهێشت
لۆرد بایرن
کوردییەکەی کامۆ ئاراز
کاتێک یەکتریمان جێهێشت
بە خامۆشی و چاوی ئەسرینڕێژ،
بە نیوە دڵشکەستی
لە یەکتر جیا بوون بە درێژایی ساڵان.
کوڵمت سپی هەڵگەڕا و سارد،
ساردتر ماچەکەشت بوو؛
بەڕاستی ئەو دەمە نیشانەی
ئەم پەژارەیەی ئێستە بوو.
شەونمی بەیان
سڕ نیشت لەسەروو برۆم—
گەفی ئەو هەستەی دەدا
کە ئێستا بەڵایە بۆم—
هەموو پەیمانەکانت تێکشکاون،
ڕۆناهی ئابڕووشت ناوزڕاویەکەتە؛
گوێم لێیە ناوت دەهێنرێت،
هاوبەشم لە شەرمەزارییەکەتدا.
لەبەردەمم ناوی تۆیان هێنا،
زەنگی مەرگە بۆ گوێیەکانم؛
موچوڕکێ جەستەمی داپۆشی،
بۆ هێندە ئازیز بوویت بۆ گیانم؟
ئەوان بێئاگان من ناسیومیت،
کە باش زانیومە تۆ کێییت—
درێژ، درێژ دەخایەنێت پەشیمانیم
گەلێ قووڵتر لەوەی بگوترێت.
بە نهێنی یەکتریمان بینی—
بە خامۆشیش شیوەنمە و گریان،
لەوەی دڵت توانی لە بیرم بکات،
هەڵتخەڵەتاندم، هەی زۆرزان.
ئەگەر چاوم پێت بکەوێتەوە
پاش ساڵانێکی دوورودرێژ،
چۆن چۆنی سڵاوت لێ بکەم؟—
بە خامۆشی و چاوی ئەسرینڕێژ.
