ئەو بەدکارییانەی دەربڕینیان لە بەردەم عەدەمدا پووچە

پێشەنگ شێرزاد/ کوردستان

October 6, 2020

پێشەنگ شیرزاد لە شاعیرە تازە دەرکەوتووەکانی کوردە. لە ساڵی ١٩٩٨ لە هەڵەبجەی شەهید لەدایکبووە. پێشتر لە هەندێک گۆڤار و فێستیڤاڵەکاندا شیعری بڵاو بۆتەوە .

 

 

 

 

ئەو بەدکارییانەی دەربڕینیان لە بەردەم عەدەمدا پووچە
پێشەنگ شێرزاد

 

 “چ شۆخییەکە لە جوانیدا مردن؛ تا لە دەرگای جەھەنەمەوە ڕووبەڕوو قسە لەگەڵ خودا بکەیت.”
                                                                                                                           بەختیار عەلی  

“بە برینەوە مرۆڤ ناچار کرا بە ژێریدا بڕوات،
بە یادەوەرییەوە ھەمووان ناچار کراین لە ژێریدا بمرین/ ئەم ئاسمانە”
زاموا محەمەد       

                                                                                   

 

جارێکی تر ھیچ دەستێکت لێ گیر نابێت
دوو پێ لەم شارەدا
بەرەو پیری ڕەمەکە گوشراوەکەتەوە نایەن،
مەمکی ھیچ مەملەکەتێکشانسی لێو پێوەنانێکت پێ نادات.
لە سیحری ئەم ئاسمانە ساردە ناگەیت، کە زەویی نییە؛
لە گەردنی خودادا؛
جێ ماچی فریشتەکانت پێ ناژمێردرێت ئیتر.
مایەپووچبوونی پێغەمبەرانت لەبیر دەکەیت
وەک ئەوەی ھەرگیز لەنێو تارمایی [شوێن]دا سەرخۆش نەبووبن.
باڵندە پەڕ زەردەکەی ناو سینگت جارێکی تر نافڕێت.
نابیتەوە بە خەڵکی شاری خۆت.
ئەفسووس، پەڕەی شادییت بە با دەدات/ ئاسمان لە بارینێکدا دەبێتە خامێکی ڕەش.
لەژێر ئەستووریی حەسرەت و گوماندا دڵت پارچە پارچە دەبێت و باکت نییە؛ دڵی خۆت دەدەیتەوە.
سیحری ژیان سەر و چاوت دەتەنێت؛ خەڵکان پێوەندی شەون و لە شەودا خامۆش دەبن: لەبەرەبەیاندا تۆ ئەھریمەنانە گۆڕ بۆ ئەوینت ھەڵدەکەنیت.
گۆرانییەکی خراپ دەڵێیت؛ ئادەمییانە دەگریت بۆ بەھەشت و نایەت/ چ بەھەشتێکە چوون.
ھاوڕێکانت لە شار ون دەکەیت، لەناوەڕاستی یەکێک لە کوچەکانی دڵتدا ون دەبیت/ جاڕس لە ونبوونیش، تەنگیی کووچەکەت سێڵاوت پێ دەخواتەوە، دەتکات بە پەند.
بەڵام
لەناو ئەم ئەبەدیەتەشدا ناخنکێیت، چونکە تۆ دەریایت؛
لاڵیی موسایەکی تر دەهێنیتەوە
بەسەر خاچی خۆتەوە، تاجە دڕکینەیەکی تر دەگێڕیتەوە.
مەمکەکان لە قوڵینەیەکدا دەبەیت بۆ کانی
قاچ بە گۆجەکان دەبەخشیتەوە.
مەملەکەتێکی ئەبەدیی لە ئاو دروست دەکەیت/ مەمک بە دایکەکان دەدەیتەوە.
لەنێو فڕیندا لەنگەر دەگریت و گاڵتە بە دانیشتووانی ئاسمان دەکەیت/ باکت نییە؛ ھەور بە زەوی دەبەخشیتەوە.
لە ئاشتیدا دەبیتەوە بە جەنگ و ماچی پۆڵاینی بتەکانت دەڵێن تۆ کێیت؟
پاسکیلێکی شکاو لێدەخوڕیت، پاسکیلێکی بۆ ئەبەد شکاو؛ ناکەویتە نێو بەرەکانی گەورەبوونتەوە.
شارێک لە ژنی مارە کراو دروست دەکەیت؛
تیایدا پەپوولە ماچ لەگەڵ ھیچ دڕکێکدا ناگۆڕێتەوە،
پەپوولە بە قەنارەی ھیچ مێشوولەیەکەوە نابێت.
پەپوولە تیایدا سەری بە زیخەڵاندا ناکێشێت.
شارێک لە ژنی مارەکراو دروست دەکەیت؛ شارێک سۆزانیترینیان شیعر بۆ ئەوینت توڕ دەدەن.
شارێک دروستت دەکات بۆ شووکردن بە بەختەوەرییەکی سەرسەخت و پۆڵاین؛ بەختەوەرییەک کە نییە و خۆی وەک سەرابیش نیشان دەدات،
شارێک وەک دەستڕێژ، بەختەوەری سەخت دەڕژێنێتە ڕۆحتەوە.
قەرەباڵغترین خۆکوژی دروست دەکەیت/ قەرەباڵغترین شوێنێک، کە پڕ بێت لە لەبیرچوونەوە لەپێناو ئازادبووندا/ دەبیت بەو خودایەی حەوت ڕۆژی ھەفتە لەگەڵ کۆیلەکانی پیاسە دەکات.
دەبیت بە کەسێکی چاوەنواڕ؛ تا ھەموو شتێکت لێ بێتە دەرەوە و دەستت لەنێو خۆتدا گیر نەبێت/ سواری پاپۆڕی مانا دەبیت بەرەو چەرخێکی بێ ئاگر.
لەنێو پاپۆڕی مانادا:
دەبیتە جەللادی ئاسمان،
باکت نییە چەند ئەفسانەی خانەدان لە ھەناوی دزێوی تاڤگەدا دەکوژیت.
باکت نییە چەند ئەندازیار لە جەنگەڵە ملڕووتەکاندا دەکوژیت.
باکت نییە چەند چرۆی خەون لە پیرێکی چوار ژنەدا دەکەیت بە قەقنەس.
باکت نییە چەند دانە لە ناوەکانت وردوخاش بوون.
باکت نییە ڕێبەری سوپای چەند پەپوولەی بێ ڕۆحی دڵ سپیت.
باکت نییە چەند ماندووی پینەکردنی چادری پاپۆڕەکەتی،
باکت نییە لەنێو چەرخە بێ ئاگرەکەتدا؛ بەرەو بورکانێکی توڕە دەڕۆیت.
باکت نییە خەونی کەشتیبوونی پاپۆڕەکەت مرد.
باکت نییە خودا دەستێک ناوەشێنێت و شنەیەک نایەت
تا ماندووبوونت لە مانا بحەسێنێتەوە و
بێباکانە لەسەر لێواری مەرگت ڕاکشێیت.
باکت نییە گەر هەر ئێستاش فوو
بە نەفخی سووڕدا بکرێت و دارودەستە دڵپاکەکەی ئیسرافیل
چەند جارێک بڵێن ئااخ.
کێ دەکوژیت؟
باکت نییە؛ ماچت بە گەردنی خوداوە جێ دەمێنێت.