کاتێک هەتاو لە چاوەکانتدا زیندانی دەکەیت
سەرکەوت جەبار/شاعیری کورد
May 21, 2018
سەرکەوت جەبار، لە شاعیرانی نوێی کوردە و لە ١ـی ٥ـی ١٩٩٠ لە دایک بووە. ئەو شیعر دەنووسێت و جارجاریش لە فارسییەوە وەردەگێڕێت. هەروەها سەرقاڵی سینەمایە و فیلمێکی دیکۆمێنتاریی بە ناوی «هاوار» دروست کردووە. – باڵندە
کاتێک هەتاو لە چاوەکانتدا زیندانی دەکەیت
سەرکەوت جەبار
بیر لە چی دەکەیتەوە
کاتێک وشەکانی ناو چاوت وەک شەپۆلی کەنار دەریا هاژەیان دێت و
ناتوانیت هیچ بڵێیت؟
بیر لە چی دەکەیتەوە
کاتێک سیسەمەکەت دەبێتە خاچ و
بۆ هەمیشە لەسەری لە خاچ دەدرێیت؟
بیر لە چی دەکەیتەوە
ئەو کاتەی ناوکت جەستەت لە باوەش دەگرێت و
مەمکەکانت دەبنە زیندانیی جەستەت و بۆ هەمیشە لەناو
قەفەسی جەستەتدا زیندانی دەکرێن؟
بیر لە چی دەکەیتەوە
ئەو کاتەی زەمەن لە نێوان دەستە شمشێراوییەکانیدا هەڵی گرتوویت و
بۆ هەر جێیەک دەچیت بەر لێوارە تیژەکانی دەکەویت؟
بەهار دێت و دەستی هاوین دەگرێت و
پاییزیش دەستی زستان، بەڵام تۆ
لەسەر سیسەمەکەت ڕاکشاویت و نازانیت بیر لە چی دەکەیتەوە
بیر لە چی دەکەیتەوە
ئەی پەڕەسێلکەی باڵشکاوی ناو تۆفانی زەمەن؟
بیر لە چی دەکەیتەوە
کاتێک پرچت وەک ڕووبارێکی بەخوڕ
دەڕژێتە دەشتی جەستەتەوە و چاوەکانیشت لە بری ئەستێرەکان
دەبریسکێنەوە؟
بیر لە چی دەکەیتەوە
کاتێک منداڵەکەت چاوەڕێت دەکات و
تۆش لەسەر سیسەمەکەت بۆ هەمیشە
زیندانی کراویت؟
بیر لە چی دەکەیتەوە
ئەو کاتەی پەنجەرەی ژوورەکەت دەکەیتەوە و
دەتەوێت هەتاو لەناو چاوەکانتدا زیندانی بکەیت و
لە چارەنووسی خۆت هەڵبێیت؟
بیر لە چی دەکەیتەوە
کاتێک وشەکان لەناو بێدەنگیی چاوەکانتدا
زیندانی کراون و ناتوانن بێنە دەرەوە؟
بیر لە چی دەکەیتەوە
ئەو کاتەی شەونمەکانی سەر جەستەت
دەبنە تابووت و تێیدا دەنێژرێیت؟
بیر لە چی دەکەیتەوە
کاتێک هەتاو دەبێتە تابووتی شەونمەکان؟
بیر لە چی دەکەیتەوە
کاتێک وشەکانم لە دەستوپەنجەت دەئاڵێن و
دەمەوێت وەسفی ڕووخسارت بکەم، بەڵام
ناتوانم؟
بیر لە چی دەکەیتەوە
ئەو کاتەی لە ڕووخساری منداڵەکەتدا
بۆ ڕووخساری پەژموردەبووی خۆت دەگەڕێیت؟
بیر لە چی دەکەیتەوە
ئەو کاتەی مردوویت و
لەناو پەلکەگیاکاندا نێژراویت و دەتەوێت بگەڕێیتەوە بۆ ژیان؟
ئاخۆ بیر لەوە دەکەیتەوە کێ لە بری تۆ دەژی؟
بیر لە چی دەکەیتەوە
کاتێک جەستەت دەبێتە پاییز و
گەڵاکان هەڵدەوەرێنیت؟
بیر لە چی دەکەیتەوە
ئەو کاتەی هەورەکان لە جەستەت لە دایک دەبن و
دەبنە باران بۆ منداڵەکەت؟
بیر لە چی دەکەیتەوە
ئەو کاتەی لە ئاوێنەکەتدا بۆ منداڵیی خۆت دەگەڕێیت و
نایدۆزیتەوە؟
