بەرەو دارستانە تاریکەکان

زێڵدا/شاعیری کورد

November 20, 2018

 

زێڵدا، یەکێکە لە شاعیرانی کورد لە نەوەی نوێ. لە هەولێر لە دایک بووە. تەمەنی بیستوسێ ساڵە و ماوەی چەند ساڵێکە دەستی کردووە بە نووسین. زمانی ئینگلیزی خوێندووە. بە کوردی و جارجار بە ئینگیلیزییش دەنووسێت. لێرەدا سێ شیعری کورتی دەخوێننەوە؛ شیعری یەکەم جیهانی بە دارستانێک چواندووە، کە تۆ، وەک مرۆڤێک، دەبێت ڕێگەکەی خۆت بدۆزیتەوە، ئەمەیش هەڵبەت مەتەڵەکەیە. شیعری دووەم و سێیەم، سەر بە دنیای ونبوون و بیرەوەرین. – ماڵپەڕی باڵندە

 

 

 

 

بەرەو دارستانە تاریکەکان
زێڵدا
وەرگێڕانی لە ئینگلیزییەوە: ئاڵا موحسین

 

 

‎ئەو جیهانە وەكوو دارستانێكی قەبەی تاریكی، تەمومژاوی، شێدار وایە

ناتوانم هەنگاوێك بەرەو پێشەوە باوێم

‎لەسەر ڕێگەكەم قاچەكانم لە قوڕ گیریان خواردووە؛ ئاژەڵەكانی نێو دارستانەكە دەمتۆقێنن: كوندەپەپووەكان، گورگەكان، تەنانەت جڕوجانەوەرەكانیش.

‎لەو كاتەوەی دەستم بە دۆزینەوەی ڕێگەیەكی نوێ كردووە ون بوومە، كە ڕێگەیەكی قوڕاوی، ترسناك و

‎تاریك نەبێت.

‎بەڵام بە داخەوە! وەك مەتەڵێك وایە.

■

 

 

نامە خەمگینەکەمم تەواو نەکردبوو کە پێی دەگوتی: من دەترسم.

هەتا جگەرەکەشمم تەواو نەکردبوو، کۆتاقوومی قاوەکەشم.

ون بوویت.

وەک خەونێکی کاڵەوەبوو، وەک بیرەوەرییەکی لەیادچوو.
■

 

 

دەڵێم تۆ لێرەیت

کە سەیری وێنەکەت دەکەم

هەست بە گەرمیی

لێوەکانت دەکەم لەسەر شانی ڕووتم

دواتر لەرزێک جەستەم دەتەنێت

بیرم دەکەوێتەوە ئەوە

تەنیا خەیاڵی بەردەم وێنەکەتە