ئێمەیش بە ڕەنگی مانگەشەو دەدوێین

ڕوباب موحیب/شاعیری ئێرانی

November 12, 2020

ڕوباب موحیب، شاعیر و وەرگێڕی ئێرانی، ساڵی ١٩٥٣ لە ئەهواز لە دایک بووە. لە سەرەتای نەوەدەکانەوە دەستی کردووە بە چاپی کتێبەکانی. شیعر و چیرۆک وەردەگێڕێت و لە بواری پەروەردەی منداڵانیشدا دەنووسێت. هێندێک لە شیعرەکانی بۆ زمانەکانی عەرەبی و سوێدی وەرگێڕدراون. لە نووسیندا واتاگەرا و زمانتێکشکێنە و لە وەرگێڕاندا زیاتر ئەو شاعیرانەی خۆش دەوێن کە زمانێکی تایبەت و ڕەوانتریان هەیە. ئەو شیعرانەی لێرەدا دەیخوێنیتەوە، هەڵبژاردەیەکی شیعرەکانی ئەون لە ٢٠٠٤ـەوە بۆ ٢٠٠٩. – ماڵپەڕی باڵندە

 

 

ئێمەیش بە ڕەنگی مانگەشەو دەدوێین
ڕوباب موحیب
وەرگێڕانی: شاڵاو حەبیبە

 

 

 

نووشتاوە
لە نێوان درزەکاندا

 

هەموو شتێک لە جێی خۆیەتی
دیوارەکان، قەڵشتەکان، دەرگا داخراوەکان
میلە بێدەنگەکانی کاتژمێرە دیوارییەکە و
منیش کە مەودای دوو ژوور تەینەکردوو دەگەڕێمەوە

 

غوربەتی ماڵەکە قورسە
کە من لەنێو گەڵاکانمدا دەمێنمەوە
*

 

 

چوارچێوە
جیهانی ملکەچبوونە
بۆ وێنە بێگوناحەکان

 

ڕۆژانە
لاڕووەکەم لە چوارچێوە دەردەکێشمە دەرەوە
لۆچێک دەسڕمەوە

 

پشت وێنەکان
بێنیگا دەمێننەوە
*

 

 

مەرگێک کە مردووەکەم بە کۆڵ دەبات
سەری گەیشتووەتە ئاستی شانەکانم
من
بەڵام
هێشتا لە بازنەدا
لە دەوری بازنەکان دەخولێمەوە

 

چوار ئاراستەکە:
سەرلەدووی یەک ئاراستەن.
*

 

 

تێکڕای چیرۆکەکەش ئەوە بوو کە لاڵ بم
لە تاو برینێک کە جەستەم هەڵدەگڵۆفێت.
لە برینێکدا کە جەستەم هەڵدەگڵۆفێت، بەڵام خۆ حەشار نادەم.
دیارترم لە هەمیشە.
*

 

 

بوونی ئێمە
جێ بە کەسێک لێژ دەکات
کە لە دەرەوەی چاڵەکەدا دەمێنینەوە
*

 

 

تۆکمەییی جەستە بەردینەکان
لەسەر هەیوانی ڕووخاوی کۆشکەکان

 

مێژوو…
… شوێنێکی بەرتەسک نییە

 

کوخێک
با چێ بکەین
*

 

 

هۆی سێوەلاسوورە
دوور لە ڕووت
لێرە
خودانی یاسا
ڕیاون

 

نایدۆزیتەوە؟
شوێنەکەی من؟
*

 

 

هێندە شیعر
ڕژاوەتە ژێر پێستم
کە ئیتر ترسم لە نێوان دێڕەکاندا دیار نییە
خودی دێڕەکانە-
ترسم
*

 

هێندە پەیڤم
خزاوەتە نێو گۆشتم
کە ئیتر سێبەرەکەم بەرزتر لە خۆم وەستاوە،
دەدوێت
بە زاری من.
*

 

 

لە ئەلفێکدا
کە بەژنی مرۆڤ بوو
ڕاست بووینەوە
لە نێوان پەیڤەکانماندا.

 

وشە لە هەمبەر وشە
نەبووینە مرۆڤ
ئێمە خوداگەلی بچووک ڕووبەڕوو
هەر
لە
ئەم
ئەلفەدا
کە بەژنی ئێمە بوو:
بەژنی مرۆڤ
*

 

 

بزاوتێکی سپی
لای سەروە کێوییەکانەوە
پەپوولە خەونی سووتانەوەی سەوز دەبینێت
لە کەلووی دڕاودا.

 

دەریا، بەڵام هەرەو دەریایەیە
نوقمی تەم
نەرم و هێدی لەم ئێوارەیەدا دەبزوێت
*

 

 

سروەیەک لە نێوان میلەکانی سەعات و ژمارەدا.
شەمەندەفەرێک کە نایەت، دەڕوات.

 

لە لەپی دەستدا
ڕووخسارێک خۆی حەشار داوە
بچووکتر لە لەپی دەست.
*

 

 

دەڵێت: «سیسرکیش خودانی حەقیقەتی خۆیەتی
با سیسرکەکان ژێرپێ نەنێین.»

 

من نهێنیی خەمەکانی دایکم دەزانم
بۆ ئەولای جلە دڕاوەکانی سەفەری کردووە.