لە باوەشم بگرە کیژەگوڵ

وریا مەزهەر/شاعیری کوردفارس- فۆتۆئاڕت: ئاریان ئەبووبەکر، (تایبەت بۆ ڕەخنەی چاودێر)

April 28, 2018

لە باوەشم بگرە کیژەگوڵ
وریا مەزهەر
وەرگێڕانی لە فارسییەوە: شاڵاو حەبیبە

لە باوەشم بگرە
کیژەگوڵ؛
ماندووم
ڕێیەکی درێژ
بە تراکتۆرێکی خامۆشەوە
هاتووم
■

یەکەمین کەس من بووم
کە پێم وا بوو لە سەری داوە… بێچارە!
دایەگەورەی دایەگەورەی بڕوای وا بوو
جنۆکەکان دەورەیان داوە،
نەوەی نەوەی نەوەکەی دەیگوت:
«پشێویی سیستمی مێشکی!» و
خۆی پێی وا بوو
شەوی ڕابردوو، خەونێکی زۆر خراپی
بە کوالیتییەکی زۆر زۆر خراپەوە دیوە و
ئێستا خەریکە لە بێداریدا
نمایشی دەکات.

ڕاوێژکارە خێزانییەکەیان یەکەمین کەس بوو
کە پێی وا بوو «من» لە سەری داوم… بێچارە!
■

پیکنیک
دوێشەو لەناو شار پیاسەم کرد
شوێنێکی کپوبێدەنگم هەر لەو ناو شارە پەیدا کرد
دڵم بۆت گیرابوو
دانیشتم
ڕستەیەکم بۆت نووسی و خەتم لێی دا
ڕستەیەکی ترم نووسی و
دیسان خەتم لێی دا
ڕستەی تر و هەروەها ڕستەگەلی تر
کە هەر نووسیمن و هەر خەتم لێیان دا
ئەم کارەم هێندە درێژە پێ دا
کە هەستم کرد:

ڕووبەڕووی تۆ لە شوێنێک لە دەرەوەی سنووری شیعرییەوە دانیشتووم
■