ئەسپێکی برینداری بێخاوەن

عەباس کیاڕۆستەمی/شاعیر و سینەماکاری ئێرانی

April 11, 2018

عەباس کیاڕۆستەمی، شاعیر، وێنەکێش، سینەماکار و فۆتۆگرافەری ئێرانی، لە ٢٢ـی جوونی ١٩٤٠ـدا لە تاران-ئێران لە دایک بووە. ٤ـی جووڵای ٢٠١٦ لە پاریس-فەڕەنسا لە تەمەنی ٧٦ـساڵیدا کۆچی دواییی کرد. ئەو بە فیلمی “تامی گێلاس” لە جیهاندا ناسراوە. فیلمەکانی بە نێوەڕۆکە سادە و مرۆڤانییەکەیانەوە دەناسرێنەوە، شیعرەکانیشی کە لێرەدا دەیانخەینە ڕوو، وەک بڵێی لە قووڵاییی سینەماکەیەوە دەرهاتوون. – ماڵپەڕی باڵندە

 

 

ئەسپێکی برینداری بێخاوەن
عەباس کیاڕۆستەمی
وەرگێڕانی لە فارسییەوە: سەرکەوت جەبار

 

سپێتیی کۆترێک
ون دەبێت لەناو هەورە سپییەکاندا
ڕۆژێکی بەفراوی.
■

 

ژنێکی سکپڕ
بە بێدەنگی دەگری
لە بەردەم جێخەوی پیاوێکی خەوتوودا
■

 

دەریا تاریک
کەناردەریاش تاریک
چاوەڕێی خۆر بکەم
یان مانگ؟
■

 

داسی ماندوو
بە دیواری گەنجینەیەکی تاریکەوە
هەڵدەواسرێت
بۆ ماوەیەکی درێژ
■

 

لەگەڵ یەکەمین بای پاییزی
گەڵایەکی بچووک هاتە ژوورەکەم
کە نەمدەناسی
■

 

لە نەبوونی تۆدا
لەگەڵ خۆمم
گوتوبێژ دەکەین و دەگەینە ڕێککەوتن
لەسەر هەموو شتێک
زۆر بە سادەیی
■

 

ئەسپێکی برینداری
بێخاوەن
■

 

یەکێک لە ڕاهیبەکان
شتێکی گوت
ئەوانی دی پێکەنین
بە دەنگی بەرز
■

 

زەمینلەرزە
وێرانی کرد تەنانەت
کۆگای دەغڵی مێروولەکانیش
■

 

بەرهەمی دوو ڕۆژی
کاری جاڵجاڵۆکە
تێک دەچێت
بە گسکی خزمەتکاری پیر
■

 

پیاوێکی نابینا
کات دەپرسێت
لە منداڵێکی سەرەتایی
■

 

بارانێکی بەهاری
هێلانەی کۆترێک
پڕئاو دەکات
کۆترەکە بۆ بینینی بەهار چووە
■

 

گوڵێکی بچکۆلەی بێناو
ڕواوە بە تەنیایی
لە کەلێنی کێوێکی گەورەدا
■

 

لە خەیاڵمدا
دۆزەخێک هەیە
گەرمم دەکاتەوە
لە زەمهەریری تەنیایی

---

 

سەرچاوەی ئەم وەرگێڕانە
 عباس کیارستمی، همراه با باد/گرگی در کمین