لەتەکانی تاریکی

گەرووس عەبدولمەلەکیان/شاعیری ئێرانی

April 10, 2018

گەرووس عەبدولمەلەکیان، شاعیری ئێرانی، لە ١٠ـی ئۆکتۆبەری ساڵی ١٩٨٠ـدا لە تاران لە دایک بووە. چەندین خەڵاتی بۆ شیعرەکانی وەرگرتووە و هەروەها کتێبەکانی بۆ زمانی عەرەبی، فەڕەنسی و کوردی وەرگێڕدراون. “باڵندەی شاراوە”، “هیچ شتێک وەک مەرگ تازە نییە” و “قبووڵکردن” لە کتێبەکانی ئەون. – باڵندە

 

 

لەتەکانی تاریکی
گەرووس عەبدولمەلەکیان
وەرگێڕانی لە فارسییەوە: بەڕۆژ ئاکرەیی

 

بۆ کۆنەهاوڕێم، خالد الصباح
ئەو شیعرەی لە موصل تەواو بوو

 

لە سێبەری شتێکدا کە نییە
دانیشتووە و
شتێ کە نییە هەڵدەداتەوە

 

ئەو لەت لەت لە خەو هەڵدەستێ و
لەت لەت ملی ڕێ دەگرێ و
لەتە زۆرەکانی ئەو، مەرگیان جاڕز کردووە

 

ئەنگوستی ئاماژەی بە ئاسماندا کە ڕادەبوورێ
ڕوخسەت وەردەگرێ
لێی دەپرسێ:
زەردەپەڕ، جگە لە خەمناککردن
بە کاری چیی دێ؟
-ئادی!
پرسیارێ کە وەڵامە
تا هەمیشە زیندوو دەمێنێ
کەواتە وازی لێ بێنە، بهێڵە بڕوا!
■

 

شێتە ئەو
کە هەر جارێ کە دەدوێ
دیوار لە لایەکەی تری دەڕوانێ

 

شێتە ئەو
کە هێشتا پەرە بە هەڵکەندنی شەو دەدا و
لەتەکانی تاریکی
لەبن تەختدا دەشارێتەوە

 

شێتە ئەو کە گوتبووی دەڕوا
بەڵام ڕۆیشت
گوتبووی دەمێنێتەوە
بەڵام مایەوە
گوتبووی پێدەکەنێ
بەڵام پێکەنی

 

شێتە ئەو
کە بێخەمە لە ڕۆیشتن و و مانەوە و پێکەنین و
بیر لە هەڵکەندنی مانای “بەڵام” دەکاتەوە

 

دەبێ شێت بێ
کە بە گوریسەوە
لە سپێدەیان بەستووەتەوە

 

شێتە ئەو
کە دوێنێ گولـلەبارانیان کردووە و
هێشتا بیر لە هەڵاتن دەکاتەوە