خەم، گوناهـ، ئاوارەیی و ونبوون

ڕاهۆز کامەران/شاعیری کورد

January 16, 2022

ڕاهۆز کامەران لە شاعیرانی نوێی کوردە. لەدایكبووی ١٩٩٤ـە لە شاری سلێمانی و بەشی شانۆی لە پەیمانگای هونەرە جوانەكانی سلێمانی تەواو کردووە و ئێستایش خوێندکاری کۆلێجی سینەمایە. هەروەها لە (فێستیڤاڵی گەلاوێژ)دا خەڵاتی شیعری بردووەتەوە. سەر بەو دەنگە شیعرییانەیە بە جەختەوە دەیەوێت سەبارەت بەو سەردەم و قۆناغە بنووسێت کە تێیدا دەژی، کە ڕێک ئەم ڕۆژەیە. ئەو پێی بە توندی لەسەر زەوی و شارەکەی جێگیر کردووە و هەندێک جار دەیەوێت بە زمانێکی ڕاستەوخۆ لەگەڵ ڕۆژگارەکەی خۆیدا بدوێت. لەم تێکستەیدا دنیا تایبەتەکەی خۆی دەگوازێتەوە بۆ ناو شیعر و تەنانەت دڕدۆنگانە لە هەموو شت، بگرە لە بابەتەکانی نێو تێکستەکەیش، دەڕوانێت.– ماڵپەڕی باڵندە

 

 

 

 

خەم، گوناهـ، ئاوارەیی و ونبوون
ڕاهۆز کامەران

 

 

 

١

 

دەبێت هەموو ئەم پارچانە پێكەوە بنێم،
‎یەكێتیی بابەت بخەمەوە نێوان
‎خەم
‎گوناهـ
‎ئاوارەیی
‎دژیەكی و
‎خواردنەوەی زۆر
‎پەرتی
‎ونبوون
‎ونبوون
‎ونبوون
‎ونبوون

 

‎شاڵاو، سڵاو، تۆ لە شەقامی سەهۆڵەكە بە جانتایەكەوە پیاسەت دەكرد، گوێت لە گۆرانی دەگرت و هەندێك جاریش نا، بەڵام هێدفۆنەكەت هەر لە گوێت نابوو
‎لەو سەرمایەدا چی دەكەیت؟ بیرت دەكەم!

 

‎لەگەڵ زاموا باسی شیعر دەكەین،
‎وەك هەمیشە ئەو لە ئاسمانە، دەڵێت ئەدەبیات جێ ناهێڵین…
‎وەك هەمیشە من لە خوارەوەم
‎خوارەوەی كات
‎خوارەوەی زەمینێك كە كات جێی هێشتووە و لە ناكاتدا دەژی

 

‎هیوادارم ئەدەبیات جێمان نەهێڵێت!

 

‎بیری كافكا دەكەم

 

‎بیری ئازاد سوبحی

 

‎بڕیار دەڵێ: شاڵاو باشە، ئیتر من، دەنووسم: تفەنگ، هۆڵدن كۆڵفیڵد و سالنجەر…

 

‎ئۆفیلیا!

 

‎تەنیا ئەوانەی دەزانن، زیۆس لە بەینی ڕانەكانیدا كێی شاردەوە دەزانن، غەریبی مانای چی شاڵاو گیان.

 

‎بیری باوکم دەکەم…
-ئەلوو…
‎ئەلوو…
…

 

 

٢

 

‎زمان دەشێلم،
‎بڕوا پەرتوبڵاوەكانم كۆ دەكەمەوە
‎بۆ خانووە چۆڵە كۆنەكەم لە ناوەندی شار دەگەڕێمەوە…

 

تەنانەت
‎بەفر باریوە و هەموو شتێك بەرەو بێدەنگی، بێدەنگی و بێدەنگی دەڕوات…

 

‎بیرە، كە ساردە و دڵ كە گەرمە و ئێمە كە زۆر زۆر زۆر تەنیاین

 

‎دەرگا دەكوتم
‎هاوسەرە پرچ زێڕینەكەم دەیكاتەوە
‎ئەویش وەك من دژی سەرمایەدارییە،
‎مۆمی لە كارەبا
‎ئەشكەوتی لە ماڵ
‎پیاسەی لە پاس خۆشتر دەوێت…
‎بەڵام لەبەر ئەوەی سبەینێ بە ڕێ بكات
‎ئەمڕۆ لە كار ماندوو بووە.

 

‎كارەساتێك لەناومدا تا دێت گەورە دەبێت و منیش تا دێت دەنگی گوێپێنەدان بە هەموو، هەموو شتێك زیاتر دەژنەوم دژی ئەو…

 

ئەو، كە
‎ئەفسانەكان كردیان بە دەریا و منی تەنانەت بۆ خنكانیش نەگرتە خۆی.
‎بە شێنێ دەڵێم: لە فەیسبووكەكەمەوە بۆ شاڵاو بنووسە:
‎كێ هاوڕێی شەوێكە، كە سەرما مرۆڤەكانی لێ سەندووەتەوە

 

‎من ئەو شەوەم!