لەوێ دەبم

خەبات عارف/شاعیر و وەرگێڕی کورد

May 6, 2021

خەبات عارف ناوێکی دیاری نێو ئەدەبیاتی کوردییە. ساڵی ١٩٥٩ لە سلێمانی لە دایک بووە و ساڵانێکیشە لە سوێد دەژی. لە سوێدییەوە وەردەگێڕێت و لە بواری شیعردا “ئێوارستان”ـەکەی پییەر لاگەرکڤیست و “گوێ بگرە پیاوی بچووک”ـەکەی ویلهێلم ڕایش بە وەرگێڕانی ئەو بەناوبانگن. هەروەها شیعرەکانی سوێدەرگرانی کردوون بە کوردی. خەبات عارف خۆیشی شاعیرە و لە نێوەڕاستی حەفتاکانەوە دەنووسێت. “سەوزێکی کاڵ بوو دەباری” ناوی کۆشیعرەکەی ئەوە. – ماڵپەڕی باڵندە

 

 

لەوێ دەبم
خەبات عارف

 

 

بەیانییەک دەچم و
من لەوێ نیم،
لە دارستان

 

دارەکان بەڵام
ماون لەوێ

 

گوڵ و
مەلەکانیش
هەروەها:

 

هاوڕێیەکانم؛

 

ئەوانەی مرۆڤ
پێڵاوە خوێناوییەکانی
لە ڕقی خۆی و
لە داخی ئەوان
بە من
دەسڕی؛

 

ئەوانەی سەرمیان
دەگرتە سەوزەڵان
دڵیشم لە جریوە و
ڕەنگ.

 

بەیانییەک دەچم و
ئەوان وەک هەمیشە
لەوێن و
لە بەرایی ئەوینێکی
گیانی
بە گیانیدا
تا دنیا دنیایە
دەمچێنن و
گۆڕم
لە ڕق
دەپارێزن و
لە خوێنیش.

 

بەیانییەک
دەچمەوە و
تا دەمرمەوە

 

لەوێ
دەبم.

 

 

 

6/5/2021