میللەت محەممەد | ( ١٩٩٠ - )
November 21, 2026
میللەت محەمەد لەدایکبووی ٢٨ی تشرینی دووەمی ١٩٩٠ لە دهۆک، هەرێمی کوردستان. نووسەر و شاعیری کوردە. دەرچووی پەیمانگەی تەکنیکی شێخانە، بەشی ژمێریاری. لە ساڵی ٢٠١١ەوە دەستی بە نووسین کردووە و چیرۆک و ڕۆمان و شیعر دەنووسێت.
خاوەنی شەش بەرهەمی بڵاوکراوەیە: سێ ڕۆمان و سێ کتێبی شیعر و کورتەچیرۆک.
ئورکسترایا برسێ
میللەت محەمەد
د ناڤ یاداشتێن مرۆڤەکێ هەڕفتیدا،
دێ سرودەکێ ژ نالینێن برسێ نڤیسم و
ژ بۆ زارۆکێن ل سەر جادە و پیادەیان،
کمە سەمفونییەکا نەمر!؟
ژ بو ئورکسترایا هەژاریێ،
کمە کونسێرتەکا بێدەنگیێ
یا کو ل بن سیبەرا مایسترویەکێ نەدادپەروەردا،
ب زمانێ دەستان دەڕبرینێن خوە دژەنن.
یان ژی وان دانعەمرێن،
سەلکا ژیێ وان تژیبووی ژ ڕتمێن گەنجبوونێ و
ددەستێ واندا، بوویە ئالاڤەکێ بێهیڤیبوونێ.
ل ڤی سەردەمی ڕۆندک د جەرگێ ڕۆناهیێدا بەرهەمدهێن و
د تاڕیستاناندا گرنژینێن هنگافتی و بویاغکری؟
ل سەر کراسێ ئازادیێ،
کولیلکان ب ڕەنگێ ئاشتیێ ل خاچ ددن!؟
سەختەکاریێ ب هونەری د نەخشینن.
لەقدان یا بوویە ئالاڤەکێ شەڤێ،
ل گوپیتکێن بێزاریێ دهێتە هلکولان،
ب دیوارێن کاڤلبوویی ڤە دبتە ئالایێ نەتەوەیەکێ ژبیرکری؟
لێ ئەڤرو ل پشت پەرژانێن یەکسانیێ
دەلنکێن ئاڤێ یێن هاتینە هلدان،
بەرویکێن بایی یێن ڤاژیبووین،
بەلێ سەر یێ مایە ب ئەردی ڤە!
یێ بوویە ئامانەکێ ڤالا و
بەختێ پاشەڕۆژێ یێ کەڤتیە تێدا.
ئەی ئالایێ بوویە کفنەکێ ئاورمیشی؟
ڤان تاڕیستانێن حەزا یاخیبوونێ هەی،
دناڤ پاخلا کیژ هنارێ دا بلندی؟
ئەو چ عەرشە وەکو ئاخێ، ل سەر بوویە سەراب و
ئاواز و سرۆدێن نشتیمانی پێ دهێنە گۆتن؟
ئەی نشتیمانێ بوویە پارچەیەکا پەڕوکێ
پێسیرا ڤێ ئاخێ یا دڕیایی و
سیاسەتمەدار و بەرپرس یێن ژێ دکەڤن!؟
ژ بەرویکێن ئاخێ ، هەژار و بەلەنگاز
سیژن یێن ماینە د چاڤێن مە ڕا و
نزانین دێ بەتەنا کیژ ڕێکێ دروین،
نزانین دێ کەنگی بەختەوەریێ ژ چاڤێن خوە دەرئێخین و
ل وژدانا خوە گەرین؟
ئەو وژدانا بێهوش و مەست، نزانین چەوا دەستێ وێ بگرن و
وێ د گوپیتکا د سەرێ خوەدا بهاڤێژین،
ب نەدادی وێ دادگەهـ بکین،
دناڤ پێلاڤا جوتیارەکێدا زیندان بکین،
د تەنویرا بیژنەکێ دا وێ داخ بدین!؟
دا بزانت دەمێ نشتیمان برسی دبت
دبتە مەزنترین جەلادێ دادپەروەر!؟